(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១៧ ខែមីនា ឆ្នាំ២០២២នេះ បានចេញសេចក្តី ប្រកាសព័ត៌មាន ស្តីពីការធ្វើយុទ្ធនាការអប់រំសុខភាព ដើម្បីរួមគ្នាទប់ស្កាត់ និងបង្ការការចម្លងវីរុស កូវីដ-១៩ជាពិសេស ពពួកបំប្លែងថ្មី អូមីក្រុង (Omicron) ដែលនឹងធ្វើឡើងនៅថ្ងៃទី២២ ខែមីនា ឆ្នាំ២០២២ ទីតាំងនៅខេត្តកំពង់ស្ពឺ។
ក្រសួងបញ្ជាក់ថា យុទ្ធនាការអប់រំនេះ ដើម្បីជំរុញការទទួលខុសត្រូវរបស់បុគ្គលគ្រួសារ សហគមន៍ និងស្ថាប័នពាក់ព័ន្ធ អាជ្ញាធរមូលដ្ឋាន រួមគ្នាទទួលខុសត្រូវក្នុងស្មារតីសាមគ្គីភាព ដើម្បីកាត់ផ្តាច់ខ្សែ ចម្លងវីរុសកូវីដ-១៩ បំប្លែងថ្មី ឱ្យមាននិរន្តរភាពនៃការរស់នៅជាមួយនឹងវីរុសកូវីដ-១៩ តាមគន្លង ប្រកតីភាពថ្មីផងដែរ។
យុទ្ធនាការជាតិអប់រំនេះ នឹងប្រព្រឹត្តិទៅនៅខេត្តកំពង់ស្ពឺ ក្នុងក្របខណ្ឌទូទាំងប្រទេស នៅតាមបណ្តា រាជធានី-ខេត្ត ផ្សេងទៀតក៏មានការណែនាំឱ្យចាត់ចែង រៀបចំយុទ្ធនាការនេះដែរ ហើយនឹងប្រព្រឹត្ត ទៅក្រោមអធិបតីភាពសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ព្រមទាំងមានការ ចូលរួមពីសំណាក់ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជា ប្រធានអនុគណៈកម្មការអប់រំ បណ្ដុះបណ្ដាល និងទំនាក់ទំនងសាធារណៈ នៃគណៈកម្មការអន្តរ ក្រសួង ដើម្បីប្រយុទ្ធនឹងជំងឺកូវីដ-១៩ លោកស្រីវេជ្ជបណ្ឌិត លី អាយលែន តំណាងអង្គការសុខ ភាពពិភពលោកប្រចាំ នៅកម្ពុជា និងលោកស្រី ហូរ៉ុក ហ្វាយូហ្សាត តំណាងអង្គការយូនីសែហ្វ ប្រចាំ នៅកម្ពុជា ផងដែរ។
បើតាមក្រសួងសុខាភិបាល បច្ចុប្បន្ននេះ វីរុសកូវីដ-១៩ ប្រភេទអូមីក្រុង (Omicron) គឺកំពុងតែ សកម្មចរាចរយ៉ាងឆាប់រហ័សដោយគ្មានព្រំដែន និងគ្មានលិខិតឆ្លងដែននៅលើសកលលោក នៅ ក្នុងតំបន់ និងនៅក្នុងប្រទេសកម្ពុជា ដែលតម្រូវឱ្យបងប្អូនចាំបាច់ត្រូវតែប្រុងប្រយ័ត្ន និងបន្តចូល រួមការពារទាំងឆ្លើយតបទៅនឹងជំងឺកូវីដ-១៩ នេះឱ្យបានទាន់ពេលវេលា ដើម្បីជៀសវាងបាននូវ មហន្តរាយសុខភាពសាធារណៈ ផលប៉ះពាល់សេដ្ឋកិច្ចគ្រួសារ និងសេដ្ឋកិច្ចសង្គម រួមទាំងការចៀស វាងបាននូវការវិលត្រឡប់ទៅរកផលលំបាកនៃការរស់នៅប្រចាំថ្ងៃរបស់បងប្អូន ដើម្បីធានាបាននូវ និរន្តរភាពនៃការរស់នៅធម្មតាក្នុងប្រក្រតីភាពថ្មីរបស់បងប្អូនបានយូរអង្វែង ផងដែរ។
ក្រសួងសុខាភិបាលបានអំពាវនាវថា «សូមបងប្អូនប្រជាពលរដ្ឋទាំងអស់ ខិតខំបន្តអនុវត្តន៍ឱ្យបាន ខ្ជាប់ខ្ជួន នូវវិធានការសុខាភិបាលជាពិសេស គឺវិធានការ «ពាការពារ និង ៣កុំ» និងអញ្ជើញទៅ ចាក់វ៉ាក់សាំងកូវីដ-១៩ ដូសទី៣ឬដូសជំរុញ ឱ្យបានគ្រប់ៗគ្នា»៕
