(កៀវ)៖ តាមការចេញផ្សាយដោយ ទីភ្នាក់ងារសារព័ត៌មាន AFP នាព្រឹកថ្ងៃសុក្រ ទី២៥ ខែកុម្ភៈ ឆ្នាំ២០២២ អោយដឹងថា របាយការណ៍បឋមបានបង្ហាញឲ្យឃើញថា មនុស្សសរុប ១៣៧នាក់ បាន បាត់បង់ជីវិត នៅក្នុងរយៈពេលពេញមួយថ្ងៃដំបូង (ថ្ងៃទី២៤ ខែកុម្ភៈ) នៃប្រតិបត្តិការយោធារបស់ រុស្ស៊ី ទៅលើប្រទេសអ៊ុយក្រែន ខណៈបណ្តាប្រទេសលោកខាងលិច បានត្រឹមរួមគ្នាដាក់ទណ្ឌកម្ម។
ទីក្រុងធំៗជាច្រើនរបស់អ៊ុយក្រែន រួមទាំងរដ្ឋធានីកៀវផងដែរ បានរងការវាយប្រហារដោយគ្រាប់មី ស៊ីល និងការបាញ់ផ្លោង បន្ទាប់ពីប្រធានាធិបតីរុស្ស៊ីលោក វ៉្លាឌីមៀ ពូទីន បានចេញបញ្ជាឲ្យកងទ័ព របស់លោក បើកការវាយលុកអ៊ុយក្រែន កាលពីពេលព្រឹកព្រហាមថ្ងៃព្រហស្បតិ៍ម្សិលមិញនេះ។ បើតាមរបាយការណ៍បឋមពីអាជ្ញាធរអ៊ុយក្រែន ប្រជាជនយ៉ាងហោចណាស់ ១០០,០០០នាក់បាន រត់ភៀសខ្លួន ខណៈមួយចំនួនបានសម្ងំស្នាក់នៅ ក្នុងផ្លូវរថភ្លើងក្រោមដី។
សូមបញ្ជាក់ថា ក្រៅពីមនុស្ស ១៣៧នាក់បាត់បង់ជីវិត មនុស្ស ៣១៦នាក់ត្រូវបានដឹងថា បានទទួល រងរបួស, នេះបើតាមការថ្លែងដោយផ្ទាល់ ពីប្រធានាធិបតីអ៊ុយក្រែនលោក វ៉ូឡូឌីមៀ ហ្សេលែនស្គី (Volodymyr Zelensky) ហើយលោកថែមទាំងបានជំរុញឲ្យកងកម្លាំងយោធា និងទ័ពបម្រុងទាំង អស់ ងើបឡើងដើម្បីប្រយុទ្ធ នៅក្នុងក្របខ័ណ្ឌទូទាំងប្រទេសផងដែរ។ លោក Zelensky បានអះ អាងថា ឥឡូវនេះមានរនាំងដែកថ្មីមួយ ពុះញែករវាងរុស្ស៊ី និងពិភពលោក ដែលមិនខុសពីសម័យ សង្គ្រាមត្រជាក់នោះឡើយ៕
