(បាងកក)៖ យោងតាមទីភ្នាក់ងារព័ត៌មានរ៉យទ័រអោយដឹងថាទីភ្នាក់ងារមួយរបស់រដ្ឋាភិបាលថៃបានឱ្យដឹងថា ទីផ្សារអចនលទ្រព្យរបស់ប្រទេសថៃអាចមិនវិលត្រលប់ទៅកាន់កម្រិតមុនពេលមានការរាតត្បាតជំងឺកូវីដ-១៩ នោះទេរហូតដល់ឆ្នាំ ២០២៤ ដោយសារការស្ទុះងើបឡើងវិញនៃសេដ្ឋកិច្ចមានភាពយឺត យ៉ាវជាងការរំពឹងទុក ក្នុងគ្រា ដែលមានការផ្ទុះជំងឺសាជាថ្មី និងអតិផរណាខ្ពស់។
កាលពីខែវិច្ឆិកា ឆ្នាំមុន មជ្ឈមណ្ឌលព័ត៌មានអចលនទ្រព្យរបស់រដ្ឋាភិបាលថៃបានព្យាករថា ទីផ្សារ អចនលទ្រព្យថៃនឹងវិលមករកភាពប្រក្រតីវិញនៅឆ្នាំ២០២៣ បន្ទាប់ពីមានការបន្ធូរបន្ថយវិធាន កម្ចីទិញផ្ទះ ដើម្បីស្តារវិស័យសំខាន់មួយនេះឡើងវិញ ដែលវិស័យនេះមានចំណែកប្រហែល ១០ ភាគរយនៃផលិតផលក្នុងស្រុកសរុបរបស់ប្រទេសក្នុងតំបន់អាស៊ីអាគ្នេយ៍មួយនេះ និងផ្តល់ការងារ ដល់ប្រជាជន ២,៨លាននាក់។
ប៉ុន្តែលោក Vichai Viratkapan ប្រធានមជ្ឈមណ្ឌលព័ត៌មានអចលនទ្រព្យ បានថ្លែងថា ការផ្ទុះជំងឺ កូវីដ-១៩ជាថ្មីដែលជំរុញដោយវីរុសប្រភេទថ្មីអូមីក្រុង ដែលបានកើតមានឡើងកាលពីឆ្នាំមុន បានធ្វើ ឱ្យសកម្មភាពក្នុងស្រុកមានភាពយឺតយ៉ាវ។
លោកមានប្រសាសន៍ថា៖ «ការកើនឡើងអតិផរណា ក៏កំពុងប៉ះពាល់ដល់ប្រាក់ចំណូលនិងអំណាច ទិញរបស់ប្រជាពលរដ្ឋផងដែរ»។
ទីភ្នាក់ងារព័ត៌មានរ៉យទ័របានរាយការណ៍ថា អតិផរណាក្នុងប្រទេសថៃបានកើនឡើងដល់ ៣,២៣ ភាគរយដែលជាកម្រិតខ្ពស់បំផុតក្នុងរយៈពេល ៩ខែនៅខែមករា។
ទោះជាយ៉ាងណាលោកថ្លែងថា វិស័យអចលនទ្រព្យបានធ្លាក់ចុះដល់កម្រិតទាបបំផុតហើយ ហើយ គួរតែត្រូវបានគាំទ្រឡើងវិញដោយការបន្ធូរបន្ថយវិធាននានា និងវិធានការរបស់រដ្ឋាភិបាល។ លោកបន្ថែមថា ចំនួនផ្ទះនិងអាផាតមិនដែលសង់ថ្មី ត្រូវបានរំពឹងថានឹងកើនឡើង ៣៥ភាគរយដល់ ១០៥.០០០យូនីតនៅឆ្នាំនេះ។ប៉ុន្តែតម្រូវការពីអតិថិជនបរទេសនឹងនៅតែមានកម្រិតទាបនៅឆ្នាំនេះ ដោយសារការផ្ទុះជំងឺកូវីដ។ នេះបើយោងតាមទីភ្នាក់ងារព័ត៌មានរ៉យទ័រ៕
