ក្រុមហ៊ុនអាកាសចរណ៍វៀតណាម នឹងចាប់ផ្តើមជើងហោះហើរទៀងទាត់ទៅអឺរ៉ុបឡើងវិញ ចាប់ពីថ្ងៃទី២៤ និងទៅរុស្ស៊ីចាប់ពីថ្ងៃទី ២៩ ខែមករានេះ

 (ហាណូយ)៖ យោងតាមការចេញផ្សាយដោយ សារព័ត៌មាន Viet Nam News នៅថ្ងៃអាទិត្យ ទី២៣ ខែមករា ឆ្នាំ២០២២ គឺក្រុមហ៊ុនអាកាសចរណ៍ជាតិវៀតណាម (វៀតណាមអ៊ែរឡាញ) បាន ប្រកាសពីផែនការរបស់ខ្លួន ក្នុងការបន្តជើងហោះហើរទៀងទាត់រវាងវៀតណាម និងរុស្ស៊ី ចក្រភព អង់គ្លេស បារាំង និងអាល្លឺម៉ង់ឡើងវិញ។

ជើងហោះហើរដំបូងនឹងចេញនៅសប្តាហ៍ក្រោយ ដោយចាប់ផ្តើមពីថ្ងៃទី២៤ ខែមករានេះតែម្តង។ ដោយឡែកផែនការប្រតិបត្តិការចុងក្រោយ នឹងត្រូវមានការយល់ព្រមពីអាជ្ញាធរ ហើយនឹងត្រូវបាន ធ្វើបច្ចុប្បន្នភាពដោយក្រុមហ៊ុនអាកាសចរណ៍វៀតណាមចំពោះអ្នកដំណើរក្នុងករណីមានការផ្លាស់ប្តូរណាមួយ។ ក្រុមហ៊ុនអាកាសចរណ៍វៀតណាម គ្រោងនឹងចាប់ផ្តើមជើងហោះហើរទៀងទាត់រវាង ទីក្រុងហាណូយ និងទីក្រុងមូស្គូក្នុងមួយសប្តាហ៍ម្តង ដោយគ្រោងនឹងចេញដំណើរលើកដំបូងនៅ ថ្ងៃទី២៩ ខែមករា។ ហើយចាប់ពីថ្ងៃទី ០៨ខែកុម្ភៈទៅ ជើងហោះហើរពីទីក្រុងហាណូយទៅទីក្រុង មូស្គូ នឹងចេញដំណើររៀងរាល់ថ្ងៃសុក្រ ហើយត្រឡប់មកវិញនៅថ្ងៃសៅរ៍។

សម្រាប់ទិសដៅទៅទ្វីបអឺរ៉ុប នៅថ្ងៃទី២៤ ខែមករាស្អែក ក្រុមហ៊ុនអាកាសចរណ៍វៀតណាម គ្រោង នឹងធ្វើការហោះហើរធម្មតាដំបូងពីទីក្រុងហាណូយទៅកាន់ទីក្រុងឡុងដ៍ ដែលនឹងឆ្លងកាត់ទីក្រុង ប៉ារីស បន្ទាប់មកត្រឡប់ទៅទីក្រុងហាណូយវិញ៕