កំណើនសេដ្ឋកិច្ចរបស់ប្រទេសសិង្ហបុរីថមថយនៅត្រីមាសទី៤ ដោយសារវីរុសប្រភេទថ្មីអូមីក្រុង

(សិង្ហបុរី)៖  តាមទីភ្នាក់ងារព័ត៌មានរ៉យទ័រ គឺបានប្រាប់អោយដឹងថា កំណើនសេដ្ឋកិច្ចរបស់សិង្ហបុរី ត្រូវបានរំពឹងថានឹងថមថយសន្ទុះនៅត្រីមាសទី៤ មួយផ្នែក ដោយសារភាពមិនប្រាកដប្រជាដែល​បង្កឡើងដោយវីរុសអូមីក្រុង ហើយអ្នកវិភាគបានឱ្យដឹងថា ចក្ខុ វិស័យសម្រាប់ឆ្នាំក្រោយនឹងផ្អែកលើ វឌ្ឍនភាពសេដ្ឋកិច្ចសកល។

យោងតាមការព្យាករជាមធ្យមរបស់សេដ្ឋវិទូក្នុងការស្ទង់មតិដែលធ្វើឡើងដោយទីភ្នាក់ងារព័ត៌មានរ៉យទ័របានឱ្យដឹងថា ផលិតផលក្នុងស្រុកសរុប (ផ.ស.ស) ត្រូវបានគេមើលឃើញថានឹងកើនឡើង ៥,៤ភាគរយនៅត្រីមាសទី៤ ធៀបនឹងរយៈពេលដូចគ្នាកាលពីឆ្នាំមុន។ នៅត្រីមាសទីបី សេដ្ឋកិច្ច សិង្ហបុរីបានកើនឡើង ៧,១ភាគរយ។

ដោយលើកឡើងពីការស្ទុះងើបសេដ្ឋកិច្ចឡើងវិញកាលពីឆ្នាំមុនពីការធ្លាក់ដុះដោយសារការរាតត្បាតជំងឺកូវីដ-១៩ លោក Brian Tan សេដ្ឋវិទូប្រចាំតំបន់មកពីធនាគារ Barclays បានឱ្យដឹងក្នុងរបាយ ការណ៍មួយថា៖ «ការធ្លាក់ចុះអត្រាកំណើនប្រចាំឆ្នាំថ្មីធៀបនឹងឆ្នាំចាស់ មួយផ្នែកធំកើតឡើងដោយ សារឥទ្ធិពលមូលដ្ឋានមិនអំណោយផល»។ លោកមើលឃើញថា កំណើនសេដ្ឋកិច្ចរួមសម្រាប់ឆ្នាំ ២០២១ មានអត្រា ៦,៨ភាគរយ។

យោងតាមការព្យាករផ្លូវការបានឱ្យដឹងថា សេដ្ឋកិច្ចសិង្ហបុរីទំនងជាកើនឡើងក្នុងអត្រាប្រហែល ៧ភាគរយនៅឆ្នាំ២០២១ និងចន្លោះពី ៣ ទៅ ៥ភាគរយក្នុងឆ្នាំ២០២២។

កំណើនសេដ្ឋកិច្ចរបស់បុរីរដ្ឋមួយនេះបាននិងកំពុងកើនឡើងនៅឆ្នាំនេះពីការរងគ្រោះដោយសារការរឹតបន្តឹងនានាពាក់ព័ន្ធនឹងជំងឺកូវីដ និងការធ្លាក់ចុះសេដ្ឋកិច្ចសកល ខណៈដែលប្រទេសនានានៅជុំវិញ ពិភពលោកបានផ្លាស់ប្តូរយុទ្ធសាស្រ្តរបស់ពួកគេឆ្ពោះមករកការរស់នៅជាមួយនឹងវីរុសកូរ៉ូណា។

ទោះជាយ៉ាងណាប្រទេសដែលជាមជ្ឈមណ្ឌលទេសចរណ៍មួយនេះបានផ្អាកការលក់សំបុត្រសម្រាប់ជើងហោះហើរនិងសំបុត្ររថយន្តក្រុងចូលក្នុងប្រទេសរបស់ខ្លួនស្ថិតក្រោមកម្មវិធីធ្វើដំណើរមិនធ្វើចត្តាឡីស័កកាលពីសប្តាហ៍មុន ខណៈវីរុសអូមីក្រុងកំពុងរាតត្បាត៕