(ភ្នំពេញ)៖ តាមលិខិតសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលទទួលបាន គឺក្រសួងមហាផ្ទៃ នៅថ្ងៃទី០៤ ខែវិច្ឆិកា ឆ្នាំ២០២១នេះ បានព្រមានថា ខ្លួននឹងមិន ចុះ បញ្ជីឱ្យ គណបក្សកម្ពុជានិយម របស់ លោក យ៉ែម បុញ្ញឫទ្ធិ នោះឡើយ បើគណបក្សនេះ មិនកែ សម្រួលខ្លឹមសារក្នុងលក្ខន្តិកៈ និងរៀបចំ «កម្មវិធីនយោបាយសំខាន់ៗរបស់គណបក្ស» ឱ្យបានត្រឹម ត្រូវ ក្នុងរយៈពេល១៥ថ្ងៃ។
ក្នុងលិខិតផ្ញើទៅកាន់ លោក យ៉ែម បុញ្ញឫទ្ធិ តំណាងស្ថាបនិក គណបក្សកម្ពុជានិយម សម្តេចបាន បញ្ជាក់ដូច្នេះថា៖ ក្រសួងមហាផ្ទៃបានទទួលរួចហើយ នូវសំណើសុំចុះឈ្មោះ «គណបក្សកម្ពុជា និយម» ក្នុងបញ្ជីគណបក្សនយោបាយនៅក្រសួងមហាផ្ទៃ តាមលិខិត ដូចចុះក្នុងយោងខាងលើ។ ពាក់ព័ន្ធនឹងសំណើនេះ ក្រសួងមហាផ្ទៃបានពិនិត្យឃើញថា គណៈកម្មាធិការ បណ្តោះអាសន្ន គណបក្សកម្ពុជានិយមពុំបានភ្ជាប់មកជាមួយនូវ «កម្មវិធីនយោបាយសំខាន់ៗរបស់គណបក្ស» ស្របតាមបញ្ញត្តិមាត្រា២០ នៃច្បាប់ស្តីពីគណបក្សនយោបាយ។ ទន្ទឹមនេះ លក្ខន្តិកៈគណបក្សមានទម្រង់ ន ការសរសេរទុកចន្លោះទំនេរចោលក្នុងទំព័រ ជាច្រើន ត្រង់ជំពូក និងផ្នែកនីមួយៗ នៃលក្ខន្តិកៈ និង ខ្លឹមសារក្នុង ប្រការមួយចំនួន មានលក្ខណៈផ្ទុយនឹងបទប្បញ្ញត្តិ នៃច្បាប់ស្តីពីគណបក្សនយោបាយ រួមមានដូចខាងក្រោម៖
* ប្រការ៩ ប្រការ១៧ ប្រការ២០
ប្រការ២៥ ប្រការ៣០ ប្រការ៣៤ ប្រការ៤១ និងប្រការ៤៣ នៃ លក្ខន្តិកៈ
បានចែងខ្លឹមសារផ្ទុយនឹងបញ្ញត្តិមាត្រា១០ នៃច្បាប់ស្តីពីគណបក្សនយោបាយ។
* ប្រការ២០ នៃលក្ខន្តិកៈ
បានចែងខ្លឹមសារផ្ទុយនឹងបញ្ញត្តិមាត្រា១៧ថ្មី នៃច្បាប់ស្តីពីគណបក្ស នយោបាយ។
* ប្រការ៤៩ នៃលក្ខន្តិកៈ បានចែងខ្លឹមសារផ្ទុយនឹងបញ្ញត្តិមាត្រា២៧
នៃច្បាប់ស្តីពីគណបក្ស នយោបាយ។
លើមូលដ្ឋានដូចបានគូសបញ្ជាក់ជូនខាងលើ ក្រសួងមហាផ្ទៃ បានស្នើឱ្យ គណបក្សកម្ពុជានិយម ត្រូវកែសម្រួលខ្លឹមសារក្នុងលក្ខន្តិកៈ និងត្រូវរៀបចំនូវ «កម្មវិធីនយោបាយសំខាន់ៗរបស់គណបក្ស» ឱ្យបានត្រឹម ត្រូវស្របតាមបទប្បញ្ញត្តិ នៃច្បាប់ស្តីពីគណបក្សនយោបាយឡើងវិញរួចហើយត្រូវផ្ញើជូនមកក្រសួងមហាផ្ទៃក្នុងរយៈពេលយ៉ាងយូរ១៥(ដប់ប្រាំ)ថ្ងៃ គិតចាប់ពីថ្ងៃទទួលលិខិតជូនដំណឹងជាកំហិត។ ក្នុងករណីមិនអនុវត្ត តាម ស្មារតីនៃលិខិតជូនដំណឹងនេះក្រសួងមហាផ្ទៃនឹងមិនអនុញ្ញាតចុះឈ្មោះក្នុងបញ្ជីគណបក្សនយោបាយ ឡើយ៕
