(ហាណូយ)៖ យោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃពុធ ទី១៨ ខែមករា ឆ្នាំ២០២៣ បញ្ជាក់ថា រដ្ឋសភាវៀតណាមនៅថ្ងៃពុធ ទី១៨ ខែមករានេះ បានអនុម័តលើ ការលាលែងតំណែងរបស់ប្រធានាធិបតីវៀតណាម លោក ង្វៀន សួនហ៊្វុក មួយថ្ងៃបន្ទាប់ពីលោក បានប្រកាសលាលែងពីតំណែង ដែលជាផ្នែកមួយនៃការប្រឆាំងអំពើពុករលួយ។
ប្រព័ន្ធផ្សព្វផ្សាយរដ្ឋបាននិយាយថា សមាជិករដ្ឋសភាជាង ៩៣ភាគរយបានបោះឆ្នោតគាំទ្រដើម្បី អនុម័តការលាលែងពីតំណែងរបស់ លោក សួនហ៊្វុក នៅក្នុងកិច្ចប្រជុំវិសាមញ្ញមួយដែលត្រូវបានបិទ ទ្វារមិនអនុញ្ញាតឲ្យប្រព័ន្ធផ្សព្វផ្សាយអន្តរជាតិចូលយកព័ត៌មាន។
ស្របតាមរដ្ឋធម្មនុញ្ញ ដោយមិនទាន់មានអ្នកស្នងតំណែងនៅឡើយទេនោះ លោក Phu Thi Anh Xuan ដែលជាអនុប្រធានបច្ចុប្បន្ន នឹងក្លាយជាប្រធានាធិបតីបណ្តោះអាសន្នដោយស្វ័យប្រវត្តិ។
ការចាកចេញភ្លាមៗរបស់លោក សួនហ៊្វុក គឺជាចលនាមិនធម្មតាមួយនៅក្នុងប្រទេសវៀតណាម ដែលជាធម្មតាការផ្លាស់ប្តូរនយោបាយណាមួយត្រូវបានរៀបចំយ៉ាងប្រុងប្រយ័ត្នបំផុត។
គណបក្សកុម្មុយនិស្តវៀតណាម បានសម្រេចកាលពីថ្ងៃអង្គារថា មេដឹកនាំអាយុ ៦៨ឆ្នាំរូបនេះ ត្រូវ ទទួលខុសត្រូវចំពោះការប្រព្រឹត្តខុសដោយរដ្ឋមន្ត្រីជាន់ខ្ពស់របស់ខ្លួន នៅពេលលោកធ្វើជានាយក រដ្ឋមន្ត្រីពីឆ្នាំ២០១៦ ដល់ឆ្នាំ២០២១ មុនក្លាយជាប្រធានាធិបតី។
សូមបញ្ជាក់ថា លោក ង្វៀន សួនហ៊្វុក គឺជាសមាជិកនៅក្នុងគណៈកម្មាធិការមជ្ឈិមរបស់បក្ស កុម្មុយនិស្ត នៅក្នុងការិយាល័យនយោបាយ និងនៅក្នុងរដ្ឋសភាជាច្រើនអាណត្តិមកហើយ។ ចាប់តាំងពីឆ្នាំ១៩៩៧ ដល់ឆ្នាំ២០០៦ លោក គឺជាប្រធានគណៈកម្មាធិការប្រជាជនប្រចាំខេត្ត ក្វាងណាំ (Quang Nam)។ ក្រោយមក លោក ហ៊្វុក ត្រូវបានតែងតាំងជា ប្រធានការិយាល័យ រដ្ឋាភិបាល នៅឆ្នាំ២០០៦ និងជាឧបនាយករដ្ឋមន្រ្តីនៅឆ្នាំ២០១១ មុនក្លាយជានាយករដ្ឋមន្រ្តីនៅ ឆ្នាំ២០១៦។ ជាចុងក្រោយ លោកត្រូវបានបោះឆ្នោតជ្រើសតាំងជា ប្រធានាធិបតីវៀតណាម កាលពីខែមេសា ឆ្នាំ២០២១៕
