(សៀមរាប)៖ ក្រសួងវប្បធម៌ និងវិចិត្រសិល្បៈកម្ពុជា មានតួនាទីជាប្រធានប្តូរវេនអាស៊ានទទួល បន្ទុកវប្បធម៌ និងសិល្បៈ សម្រាប់ឆ្នាំ២០២០-២០២២ សហការជាមួយបណ្តាអង្គទូតអាស៊ាន និងប្រទេសដៃគូ បានរួមគ្នាដាំដើមឈើ និងជិះកង់ក្នុងរមណីយដ្ឋានអង្គរ ដែលជាបេតិកភណ្ឌពិភព លោក នៅព្រឹកថ្ងៃទី១១ ខែតុលា ឆ្នាំ២០២១ ក្រោមអធិបតីភាពឯកឧត្តម ស៊ុ ម៉ាប់ រដ្ឋលេខាធិការ ក្រសួងវប្បធម៌ និងវិចិត្រសិល្បៈ និងជាតំណាងលោស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។
ឯកឧត្តម ស៊ុ ម៉ាប់ ក្នុងនាមក្រសួងវប្បធម៌ និងវិចិត្រសិល្បៈបានថ្លែងថា ទីក្រុងសៀមរាប ត្រូវបាន ជ្រើសរើសជាទីក្រុងវប្បធម៌អាស៊ានសម្រាប់ឆ្នាំ២០២០-២០២២ តាមរយៈកិច្ចប្រជុំលើកទី៩របស់ ក្រុមរដ្ឋមន្រ្តីអាស៊ាន ទទួលបន្ទុកវប្បធម៌ និងសិល្បៈ ពីព្រោះក្រុងសៀមរាប គឺជាអតីតរាជធានីនៃ ចក្រភពខ្មែរ សម្បូរទៅដោយមរតកវប្បធម៌ទាំងរូបីយ និងអរូបីយ ដែលជាគោលដៅទេសចរណ៍ វប្បធម៌ធម្មជាតិដ៏ល្បីល្បាញក្នុងពិភពលោក។
ដោយឡែក ព្រឹត្តិការណ៍ដាំដើមឈើ និងជិះកង់ក្នុងរមណីយដ្ឋានអង្គរជាបេតិកភណ្ឌពិភពលោក ពេលនេះជាកម្មវិធីមួយ ដែលក្រសួងវប្បធម៌រៀបចំឡើង ដើម្បីបង្ហាញពីសក្ដានុពលរបស់ក្រុង សៀមរាប ដែលជាទីក្រុងវប្បធម៌ដ៏ល្បីល្បាញរបស់កម្ពុជាទៅដល់ប្រទេសដែលជាសមាជិក៕
