(វ៉ាស៊ីនតោន)៖ តាមការចេញផ្សាយដោយ ទីភ្នាក់ងារព័ត៌មាន Reuters នៅព្រឹកថ្ងៃសុក្រ ទី១៧ ខែកញ្ញា ឆ្នាំ២០២១ បានប្រាប់អោយដឹងថា ប្រធានសភាតំណាងរាស្ត្រអាមេរិក មកពីគណបក្ស ប្រជាធិបតេយ្យ លោកស្រី ណេនស៊ី ផេឡូស៊ី (Nancy Pelosi) បាននិយាយថា ការគាបសង្កត់ និងការរឹតត្បិតរបស់ចិនលើសិទ្ធិមនុស្ស កាន់តែមានសភាពអាក្រក់ឡើង ហើយការគ្រប់គ្រងលើ ទិន្នន័យបច្ចេកវិទ្យា ក៏កំពុងបង្កការគំរាមកំហែងដល់លោកខាងលិចផងដែរ។
លោកស្រី Nancy Pelosi ធ្វើការកត់សម្គាល់ដូចខាងលើ ក្នុងពេលបំពេញទស្សនកិច្ចនៅចក្រភពអង់គ្លេស នៅថ្ងៃ ព្រហស្បតិ៍សប្ដាហ៍នេះ។ លោកស្រី Pelosi បានគូសបញ្ជាក់យ៉ាងដូច្នេះថា «ចិនកាន់តែគាបសង្កត់… ហើយទាំងការធ្វើកំណែទម្រង់ប្រជាធិបតេយ្យ, សេរីភាពបញ្ចេញមតិ ឬពហុភាគីនិយម ឬគ្រាន់តែ អនុញ្ញាតប្រជាជនបញ្ចេញមតិសុទ្ធតែកំពុង ស្ថិតនៅក្នុងស្ថានភាពកាន់តែអាក្រក់ឡើង»។
សូមជម្រាបថា លោកស្រី Nancy Pelosi ក៏បានកោតសរសើរផងដែរ ចំពោះសម្ព័ន្ធភាពយោធា ត្រីភាគីថ្មីមួយរបស់អាមេរិក អង់គ្លេស និងអូស្ត្រាលី ដែលទើបតែត្រូវបានប្រកាស កាលពីថ្ងៃពុធកន្លង ទៅនេះ ហើយក្រៅតែពីនេះលោកស្រីបានឆ្លៀតរិះគន់ចិនត្រង់ៗ ចំពោះការធ្វើសកម្មភាពយោធា នៅសមុទ្រចិនខាងត្បូង, ការគាបសង្កត់ ជនដើមភាគតិចមូស្លីម អ៊ុយហ្គឺ (Uyghurs), តំបន់ទីបេ និងហុងកុងផងដែរ។
សម្រាប់ការរិះគន់ និងចោទប្រកាន់ខ្លាំងៗ ពីសំណាក់ប្រធានសភាតំណាងរាស្ត្រ នៃសហរដ្ឋអាមេរិក ខាងលើនេះ គេនៅមិនទាន់ឃើញមានប្រតិកម្មណាមួយ ពីសំណាក់រដ្ឋាភិបាលទីក្រុងប៉េកាំងនៅ ឡើយទេ។ ប៉ុន្តែជាធម្មតា ចិនតែងតែតបតទៅវិញធ្ងន់ៗ ចំពោះពាក្យចោទប្រកាន់ដដែលជាដដែល បែបនេះ៕
