(ណៃពិដោ)៖ ទីភ្នាក់ងារមួយរបស់អង្គការសហប្រជាជាតិ បានឲ្យដឹងថា ទូក ៣គ្រឿងដែលពោរពេញទៅដោយជនភៀសខ្លួនរ៉ូហ៊ីងយ៉ាជាង ៥០០នាក់ បានចូលចតនៅខេត្តភាគខាងលិចបំផុតរបស់ប្រទេសឥណ្ឌូណេស៉ី កាលពីថ្ងៃអាទិត្យចុងសប្តាហ៍កន្លងទៅនេះ ដែលនេះជាចំនួនច្រើនបំផុតមួយចាប់តាំងពី យោធានៃរបបសឹកមីយ៉ាន់ម៉ា បើកការបង្ក្រាបលើក្រុមជនជាតិភាគតិចមួយនេះក្នុងឆ្នាំ២០១៧។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី២០ ខែវិច្ឆិកា ឆ្នាំ២០២៣។
មន្ត្រីការពារជនភៀសខ្លួនរបស់អង្គការសហប្រជាជាតិ លោក Faisal Rahman បានប្រាប់ AFP ថាទូកមួយគ្រឿងបានមកដល់ស្រុក Bireuen នៃខេត្ត Aceh ដោយមានមនុស្សចំនួន ២៥៦នាក់នៅលើនោះ ខណៈ ២៤១នាក់ផ្សេងទៀតបានមកដល់តំបន់ Pidie ហើយទូកតូចមួយដែលផ្ទុកមនុស្សចំនួន ៣៦នាក់បានទៅដល់ភាគខាងកើតនៃខេត្ត Aceh។ អ្នកកាសែតមួយរូបរបស់ AFP ដែលបានឃើញទូកជនជាតិរ៉ូហ៉ីងយ៉ាចូលចតនៅលើឆ្នេរខ្សាច់ក្នុងទីក្រុង Bireuen និយាយថា ជនភៀសខ្លួនទាំងនោះកំពុងត្រូវបានប្រមូលផ្តុំឲ្យនៅទីជម្រកបណ្តោះអាសន្នមួយ ដើម្បីរង់ចាំការសម្រេចចិត្តពីអាជ្ញាធរលើ ជោគវាសនារបស់ពួកគេ ដែលភាគច្រើនមានសុខភាពល្អ៕
