(វ៉ាស៊ីនតោន)៖ អតីតប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារសប្ដាហ៍នេះ (ម៉ោងនៅវ៉ាស៊ីនតោន) ត្រូវបានចោទប្រកាន់ជាផ្លូវការពីបទព្រហ្មទណ្ឌ ពាក់ព័ន្ធនឹងការព្យាយាមកែប្រែលទ្ធផលបោះឆ្នោតប្រធានាធិបតីកាលពីឆ្នាំ២០២០ ខណៈរូបលោកកំពុងដឹកនាំយុទ្ធនាការឃោសនាបោះឆ្នោត សម្រាប់ ការបោះឆ្នោតប្រធានាធិបតីអាមេរិកនៅឆ្នាំ២០២៤។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២ ខែសីហា ឆ្នាំ២០២៣។
លោក ត្រាំ ត្រូវបានចោទប្រកាន់ចំនួន ៣បទចោទ ជុំវិញការសមគំនិតបោកបញ្ឆោតសហរដ្ឋអាមេរិក និងមួយបទចោទទាក់ទិននឹងការបង្កឧបសគ្គដល់ដំណើរការ ស្វែងរកយុត្តិធម៌។ ការចោទប្រកាន់ទាំងនេះមានកម្រាស់ ៤៥ទំព័រ និងត្រូវបានដាក់ជូនតុលាការក្នុងទីក្រុងវ៉ាស៊ីនតោន ឌីស៊ី ដោយរដ្ឋអាជ្ញាពិសេសអាមេរិក លោក Jack Smith ដែលបានដឹកនាំការស៊ើបការអង្កេតលើអតីតប្រធានាធិបតីអាមេរិករូបនេះ ក្នុងនាមក្រសួងយុត្តិធម៌អាមេរិក៕
